Mohamed Elsayed

ع ناصية | مطور ويب متخصص في بلوجر واقدم هنا خلاصة تجربتي في التعلم

حلول لمشكلة الرذاذ و طرقعة الوك في الفيب



لما بندوس فاير والكويل بيبخر الليكويد ساعات بيبقى في صوت عنيف و طرقعة جامدة.. طرقعة يعني ليكويد بيطير وهو سخن.. يعني رذاذ مولع.. لو التانك بتاعك مافيش في تصميمه ايه حاجة تمنعه هيوصل زي الرصاص للسانك وزورك ويسيب احساس مؤلم ممكن قوي يقلب بقرحة تعكنن عليك كذا يوم او خرم في شفتك او لغلوغ حضرتك البرئ.

اختلفت الاساطير في سبب الطرقعة والرذاذ وبعيدا عن الفتي والاساطير السبب الرئيسي ليها انه في ليكويد زيادة عن اللزوم فوق او بين لفات الكويل مش بيـتبخر بالسرعة الكافية بس بيغلي وتحته على مسافة اقرب من معمعة الكويل ليكويد اتبخر بس محبوس وعايز ينطلق فبيطير وياخد في سكته اللي بيغلي ولسه ماتبخرش ويجي زي الصاروخ على زورك.. نسيبنا بأه من هري كتير ونمسك في دا.. ليكويد زيادة على الكويل يعني طرقعة ورذاذ.. ممكن تكون محظوظ واتجاه الرذاذ مايكونش في اتجاه النفس لكن في النقطة دي في ناس كتير جدا حظهم منيل بنيلة كتير جدا (سواء الناس او النيلة الاتنين كتير)..
السؤال بأه ايه اللي بيخلي ليكويد زيادة يتجمع على الكويل ويجيبلنا العكننة دي عشان نعالجه.
نفهم اكتر
ناخد الموضوع على شقين.. في كويلات جاهزة وفي كويلات بتتعمل على ريبلد RBA.. الاتنين سببهم ومشكلتهم واحدة.. الوك.. مش الكويل.

الليكويد بيتجمع على الكويل في مكان من اتنين يا اما بين لفات الكويل لو فيها مسافات (زي سبيسد كويل او تويستد) والوك بتغرقه يا اما في "جيب هوا" او “Air Pocket” ودا عبارة عن فجوة صغيرة قوي قوي بين القطن و واحدة او اكتر من لفات الكويل. الجيب او الفجوة مش هتعرف تشوفها بعينك لكنها كافيه لتحويش قطرة ليكويد وبالسلامة انت كدا تعال يوم التلات خد الاشعة.. عرفت بأه بنقولك شد اطراف الكويل اللي بتلفه على المفك ببنسه او كماشة ليه قبل ما تركبه.. عشان لفاته تبأه مشدودة على نفس القطر مش واحدة واسعة وواحدة ضيقة والقطن يمشي بفراغات فيهم.. وعرفت بأه ليه الكويل الرأسي Vertical Coil ملك الرذاذ.. عشان عمر القطن اللي حواليه من برا ما بيكون محكم زي قطنة مدفوسة من جواه.

كانو بيقولوك اعلى بالوات ودا بيساعد في تبخير اللي كان بيغلي بدل ما يطرقع بس ممكن يكون مستوى الوات المناسب مش اللي انت تحبه.. وكانو بيقلولك وطي الوات عشان التبخير يحصل ببطء عشان مايقلبش بغليان وفرقعة سريعة بس ممكن الوات المناسب يكون قليل على كلاود وفلافور انت عايزها. دا غير انك لو كويل جاهز يقولك مالكش حل غير كويل جديد ويمشي و يسيبك تلعب مع الاسد ولو بتعمل ريبلد يقولك غير الوك ويمشي ويسيبك تلعب مع مرات الاسد لحد الاسد مايخلص لعب مع زميلك ويجيلك.
هنقول حلول "مجربة" وفعالة للي معاه كويل جاهز واللي بيعمل ريبلد.. ممكن حل واحد يكفيك او ممكن تعمل كل اللي يناسبك.

الحلول
نحط الهدف الاول.. الغاء الرذاذ او على الاقل منعه من الوصول ليك.. سواء بكويل تحته وك مابتغرقوش ليكويد ومافهاش جيوب هوا تحوش ليكويد برا القطن او بشكل تاني يراعي الناس اللي معاهم كويل جاهز مايقدرش يلعب فيه قوي.

حل #1.. "الشيزوفرينا" .. للجاهز والريبلد

لو مش عايز او مش قادر تعدل الوك.. الشيزوفرينا هي الحل.. زمان قلنا القطن له شخصية وهو مبلول وشخصية وهو ناشف.. احنا هنجيبله شيزوفرينا..

هنبله ينفش وبعدين ننشفه وبعدين نبله ينفش تاني لو لسه فيه نفش.. حاجة بتاعة عشر دقايق عشان كويل هتعيش بيه اسبوع او اتنين.. ازاي يعني وضح اكتر.. ماشي.

وانت في العادة بتركب كويل جديد بتشربه ليكويد قبل ماتقفل عشان القطن مايتحرقش.. كتير جدا احنا بنشبع القطن بزيادة ودا بيغرق الكويل مهما بخرنا بيفضل غرقان لان الوك اول باول بتعوض حتى لو كان التعويض بزيادة.. اول حاجة اربط مسمار السنتر بن كويس في التانك من تحت وبعدين اربط الكويل هيد او قطعة الريبلد في التانك كويس عشان اي عدم احكام بيسيب خلخـلة و فراغ في جسم التانك وضغطه وبيسبب تعويم ليكويد للكويل بسبب خلخلة الضغط.. تاني خطوة اقفل فتحات الليكويد لو التانك فيه اوبشن كدا ولو مفهوش اقلبه لتحت بحيث تعزل الفتحات عن الليكويد وبالتالي "تجفف منابع الوك".. وفيب شويتين كدا على وات هادي 15 لـ 18 بالكتير والوك مش طايلة ليكويد لحد ماتنشف والبخار يقل وابدا بالراحة خد سحبات خفيفة عشان انت بتقرب من دراي هت.. في بأه دراي هت بتبقى خفيفة يدوب تحس "بريحة شياط خفيفة قوي.. قوي" وفي دراي هت بتعمل حمل خارج الرحم.. اللي عايز التانية هو حر بس احنا هنا عايزين الاولانية ودي من سحب خفيف متواصل لحد ما الوك تنشف وتحس بشياط خفيف قوي قوي.. 

كدا القطنة نشفت سيبها ناشفة خمس دقايق وافتح فتحات الليكود او اعدل التانك واسحب سحبتين هوا من غير فاير (سحبتين مش اتـنين تسونامي عشان ماتغرقش الوك).. دا عشان الوك ترجع تشرب ليكويد بس المرة دي هتشربها بمقاسها وسرعتها هي مش بمقاس ايدك اللي كانت بتليفها وانت بتركبها اول مرة.. دا غير ان القطن اتبل ونشف واتبل تاني هيخليه يحاول ينفش اكتر ولو فيه جيب هوا فرصتك كبيرة انه يتقفل تلقائيا مع النفش.. انا مجرب دي وشغالة تمام.. .ساعات بيفضل طرقعة خفيفة بس الرذاذ بيقل جدا جدا اذا مانتهاش اصلا ولو ماظبطتش اول مرة كررها هتظبط. لو مش ظابطة يبقى عيب الوك او مقاسها او فيها خرم اوزون مش جيب هوا وعايزة حل تاني خالص.. عرفت ليه بيقولولك استحملها شوية لو الكويل جديد وهي تتحل.. عشان التانك اما بيفضى الوك بتنشف وانت ترجع تعبي تاني.. القطن حصله شيزوفرينا وانت مش واخد بالك.

حل #2.. "فلتر المش".. للجاهز والريبلد

لو عايز حل سريع من غير اي تعديل في اي حاجة او لو مستمتع بالطرقعة بس مش عايز الرذاذ استخدمStainless Steel Mesh 500 or 400 تحت الدرب تيب.. المش دي عاملة زي الشبكة وبتلعب دور الفلتر في مشكلتنا.. قص حته صغيره على مقاس الفتحة اللي تحت الدريب تب ورقدها فيها وركب عليها الدريب تب.. فعالة وتشتغل زي الالف هتعديلك هوا مرتاح مش هتاثرعلى كلاود ولا فلافور لكن هتصطاد اي رذاذ طاير عايز ياخدك غرز في زورك.. بس المهم تكون فتحاتها مش ضيقة قوي تقتل النفس ولا واسعة قوي تعدي الرذاذ.. مقاس 500 او 400 او اللي يريحك.. بتتباع عند بعض التجار في الجروب ورخيصة جدا وانت مش هتحتاج تغيرها او تجيبها كل شوية يادوب هتنضفها بس وتركبها تاني.

حل #3.. "طخ الوك".. لبتوع الريبلد فقط

حل المشكلة من الجذور هو تغيير الوك... الوك اللي تتسبب في جيوب هوا او تغرق الليكويد هي وك نحيفة او قطنها قليل مالوش ممانعة بيتشرب ليكويد ويوصله بسرعة زيادة عن اللزوم.. او على الاقل قطنها مابيملاش مركزه ويسيب جيب هوا فارغ بينه وبين الكويل (عينك مش هتشوفه).. زود عرض القطن.. القطنة تدخل جو الكويل بشدة بس زيادة حبه عن المعتاد.. او يادوب يادوب تبقى خلاص هتتحشر بس ماتحشرهاش عشان ماتضغطش القطن وتبقى عالجت الرذاذ وتقع في مشكلة دراي هت بانك قفلت ممرات الليكويد في القطن جوا الكويل.. محتاج تدرب نفسك على قطنة اعرض سنة تملا مكانها وماتسيبش جيب هوا وسمكها يلعب ضد زيادة سرعة تغريق الليكويد وبالتالي يمنع الرذاذ.

حل #4.. بونص Bonus

الليكويد اللي فيه جلسرين قليل زي 50/50 مثلا دا بيكون سلس وانسيابي بيتزحلق جوا القطن ويوصل بسرعة و أحد الاسباب الغير مشهورة اللي تعمل غرقان ورذاذ.. غير لليكويد يكون فيه جلسرين اعلى زي 70 او اكتر عشان دا هيكون بطئ التدفق ومش هيغرق الكويل ولا يعمل رذاذ.. او استخدمه بس مع الحل رقم 3 عشان القطن هيعوق الفيضان بتاعه.
انت كدا فهمت الرذاذ بيحصل ليه.. ولو التانك مش بيحميك ومش عايز تغيره يبقى انت غاوي او ماكنتش تعرف حلول و أديك عرفت كذا حل مجربين وفعالين محتاج تجربهم لحد ماتلاقي اللي يناسبك من اجل زور ولغلوغ افضل..
ومهما حصل اوعى في يوم تنسى.. لغلوغك امانة..(حضن مطارات)

اهلاً و مرحباً بك في موقعنا
ادعمنا بالأشتراك في القناة وانضم الينا